今晚英超焦点战，「圣人」修咸顿主场硬撼「一哥」阿仙奴。阿仙奴开季气势如虹，单计近8仗全部赢晒，走势顺到冇朋友，今仗造访状态麻麻嘅修咸顿，可以食住个势再下一城，1.42倍客胜热得有道理。

　　依家喺中下游挣扎嘅修咸顿，尽管崇尚逼抢打法，但除咗上轮赢般尼茅夫1比0外，今季其余场场联赛都有失波，明显系前场逼抢唔够一致性，令到防线出现漏洞，单计近6仗联赛只得1胜1和4负，状态认真麻麻，阵中主力中坚贝拿高卓普仲要重创休养到年尾，真系雪上加霜，今晚就算有主场之利都信唔过。

　　马加希斯续约振军心

　　相反，「兵工厂」阿仙奴一开咧立即弹出，虽然曾经作客输畀曼联，但其余13仗全部赢晒，单计近8仗更录得全胜，包括联赛击败过热刺及利物浦等劲旅，就算作客近7仗亦赢咗6场，信心爆棚。

　　老实讲，同季初火力全开相比，「兵工厂」近期攻力的确冇咁锐利，射手加比尔捷西斯脚风亦唔太顺，不过球队胜在进攻点众多，好似近两仗险胜列斯联同燕豪芬一粒，一向靠左脚搵食嘅布卡约沙卡及格列沙加，竟然用「私家Q」右脚攻入奠胜士哥，仲唔系行运行到落脚趾尾？

　　除此之外，阿仙奴日前正式宣布同中坚加比尔马加希斯续长约，虽然冇讲明续几多年，但外界估计起码有4年，证明只要球员踢得好，球队一定论功行赏，有助激励内部士气，今场客胜有计。