今晚英超早场上演「功夫脚屠狼」！曼城「锋霸」艾宁夏兰特上仗欧联一记「功夫脚」绝杀多蒙特，技惊四座，今晚「蓝月亮」再度出击作客狼队，又系夏兰特表演时间。狼队虽然防守硬净，惟近5次交手4次半场已告落後，可见曼城正系狼队克星，追半场客胜。

　　曼城今夏签入艾宁夏兰特，攻力进一步升级，联赛6仗攻入20球，计埋欧联夏兰特踢咗8仗个人攻入13球，而且唔少都系关键入波，例如上仗欧联对多蒙特，完场前飞身「功夫脚」撑入2比1绝杀，哄动全球，媲美两大经典射手告鲁夫同伊巴谦莫域，曼城有呢位挪威射手坐镇，再加上奇云迪布尼同根度简於中场铺桥搭路，要入波易如反掌。

　　「蓝月亮」锋力虽强，但後防难免会走漏眼，今季联赛就有两场先後赛和纽卡素同阿士东维拉，上仗对多蒙特亦系先失波，相信领队哥迪奥拿定必全力改善，避免再被对手偷鸡。

　　不过，曼城今场又唔使过於担心失波问题，因为狼队系英超攻力最差球队之一，至今联赛6仗仅入3球。纵使狼队防守能力唔差，6仗仅失4球，但其铜墙铁壁对曼城似乎冇效，事关近年对赛所见，「蓝月亮」近5次交锋就有4次半场领先，依家仲有夏兰特压阵，要攻破狼队嘅密集防线就更有把握，曼城半场客胜有计。