英超季前熱身賽，利物浦同水晶宮喺新加坡交鋒；「紅軍」上仗熱身賽派出多位副選，導致以0比4大敗於曼聯腳下，相信領隊高普今仗會強陣出擊，畀一眾主將更多時間「熱身」。反觀水晶宮今次亞洲之旅，陣容嚴重不整，無力同對手抗衡，加上雙方近5次對賽，「紅軍」上半場都領先，預計利物浦半場可再贏多次。

　　紅軍想簽多一個紐尼斯

　　利物浦上仗正選陣容只有門將艾利臣比加、中場佐敦軒達臣、前鋒路爾斯戴亞斯、羅拔圖法明奴屬於主力，其餘7位球員都係副選，甚至年輕小將。領隊高普解釋部分常規球員較遲歸隊，所以先任後備。嚟到亞洲之旅第2站，眾主力經過連日操練後，預料今仗可以復任正選，令高普進一步了解佢哋嘅狀態，同時亦希望贏番一仗，省靚招牌。

　　另外，據聞「紅軍」又有新兵目標，准備再出手簽多一位「紐尼斯」。有指佢哋睇中士砵亭中場馬菲奧斯紐尼斯，並已經接觸呢位23歲葡萄牙國腳嘅代表，有望以3,380萬鎊將佢收歸旗下。速度型嘅馬菲奧斯紐尼斯上季葡超入3球並交出2次助攻，而且長傳成功率高達92%，不過曼城同聖日耳門都有意搶人，「紅軍」想搶贏就要快手喇！

　　至於今場對手水晶宮本身實力已經不及利物浦，屋漏偏逢連夜雨，今次亞洲之旅名單，更只有10人屬常規球員，韋費特沙夏、馬克古希等多位主力都冇隨隊。據悉原因可能係水晶宮有唔少常規球員冇打齊兩針新冠肺炎疫苗，唔可以入境新加坡。水晶宮殘陣出擊，恐怕上半場都擋唔住利物浦強攻。