周六凌晨上演德國附加賽首回合，德丙「3哥」凱沙羅頓，主場迎戰德乙尾三嘅特雷斯登。凱沙羅頓季尾表現回落，最近仲炒埋教練，隊內士氣明顯受影響；相反特雷斯登實力佔優，加上往績食住對手，唔計熱身賽，近3次交手全勝，今場仲有得受讓，下盤不容錯過。

　　特雷斯登守得兩嘴

　　凱沙羅頓季尾連輸3場，痛失原本手到拿來嘅直接昇班資格，只能以第3名轉戰附加賽，作為今季德丙失波最少嘅球隊，近3場竟然失咗7球咁多，狀態令人擔懮。另外球隊最近仲宣布辭退教練安特普，由舒斯特頂替，雖然呢位德國新帥曾經喺2014/15球季，帶領達斯泰特昇上德甲，有番咁上下實力，不過臨陣換帥一向被視為大忌，要睇嚇一班球員適唔適應到。

　　特雷斯登今季由德丙昇上德乙，表現唔算合格，上場煞科戰主場出擊不敵尾二嘅奧厄，不過由於一早已經篤定要踢附加賽，呢場明顯留曬力。球隊踏入2022年，16場聯賽雖然未嘗一勝，不過當中有好多都係和波，要贏佢哋唔係咁容易。特雷斯登雖然係護級分子，不過防守力唔算太差，今季失球數字只係比榜首史浩克04多兩球，只係攻力較弱，今場附加賽肯定做好防守，再博偷雞，作客受讓玩得過。