今日有场澳职季後赛淘汰圈赛事，由西部联斗威灵顿凤凰。西部联季尾表现下滑，已经3战不胜，球员士气低落，加上近期碰头凤凰优势更明显，可望反客为主，一於博客胜。

　　3仗不胜士气低落

　　西部联本来仲有机会争夺常规赛冠军，但佢哋近3仗未尝一胜，包括煞科战以1比2不敌阿德莱德联，搞到要转战季後赛淘汰圈，士气唔慌好，加上对赛往绩畀凤凰食住，近4次交手全部输晒，球员恐怕未踢先脚软。

　　新西兰球队凤凰近两季因疫情关系，到4月中先至返主场作赛，喺长期四处漂流征战嘅情况下，仍然可以杀入季後赛，已经值得畀掌声。辛度禾尔、苏迪里奥和宾韦尼今季组成进攻三叉戟，成为球队进攻重心，发挥有保证。佢哋近4次对西部联全胜之余，近3次交锋上述3人合共炮制5球，对住西部联特别有计，今场有本钱反客为主，客胜好路。