周五日職獨腳戲，浦和紅鑽主場對陣廣島三箭。傳統豪門浦和紅鑽季初出閘脫腳，今場一定力爭反彈。反觀廣島三箭愈踢愈好，實力亦不容忽視。翻查數據，廣島三箭近6場全開3球或以上，捧2.5球嘅入球大穩陣。

　　浦和紅鑽成功出線亞冠盃16強，但聯賽表現認真麻麻，上場作客柏雷素爾只能拎到1分，近4場聯賽都贏唔到，目前排喺榜下游位置。不過呢隊「東洋紅魔」主場繼續有唔錯發揮，今季5場暫時只係輸過一次，當中新加盟進攻中場卡爾臣表現對辦，連同射手沙爾克，前線能對敵衞構成一定威脅。

　　攻擊手表現對辦

　　廣島三箭上場主場打出高效反擊，以3:0淨勝「1哥」鹿島鹿角，近7場聯賽只曾一敗，尤其中場柏好文狀態大勇，各項賽事近4場交出4入球、1助攻，今場有力再數胡。

　　考慮到「三箭」作客成績唔太穩定，今季5場只係贏得一次，即使球隊近況唔錯，但勝算仍然未係十足。雙方前線都有唔少出色嘅攻擊球員，季初波隨時會放開嚟踢，一於再追大盤！