周六凌晨德乙戰火重燃，其中特雷斯登將會主場挑戰史浩克04。近期一勝難求嘅特雷斯登，極希望能夠擺脫頹勢，但今場佢哋有主力前鋒倦勤，面對強敵惟有大打守勢波，球隊近期經常半場同對手打和，半場和值得再追。

　　浩克需時入局

　　深陷降班漩渦嘅特雷斯登，極需要一場勝仗重拾信心，佢哋聯賽至今僅攻入26球，攻力欠奉係戰績低迷嘅一大主因，今場主力前鋒達法拿仲因為確診新冠肺炎缺陣，勢必進一步打擊入球能力。好在呢隊波防守表現唔差，失球數比聖保利等前列分子都要少。特雷斯登比賽早段表現頑強，近6場聯賽有5次半場都摸和對手，今仗主場出擊斗前列強敵，都會以穩固防守為先。

　　力爭重返德甲嘅史浩克04，暫時排德乙第4，同榜首聖保利只差4分，為爭取直接昇班資格仍要繼續努力。「礦工」喺國際賽期前，一度取得兩連勝，先後擊敗恩高斯達特同漢諾威，但近兩周冇比賽，氣焰或多或少會減弱，而且佢哋近4場聯賽，3次半場都同對手打和，重返賽場後，需要啲時間撻番著，預計今場雙方入局都會比較慢，一於吼實半場和。