今晚英足盃8强「英超对决」，修咸顿主场斗曼城。曼城近期多线作战表现跌Watt，无锋阵踢法似乎开始被对手睇穿，加上佢哋近年每逢遇上「圣人」，入球都唔算多，今场战况随时再陷胶着，中位数2.5球入球细值得再追。

　　继欧联16强次回合同士砵亭互交白卷後，曼城上仗英超占尽优势下，作客同样只能闷和水晶宫，连续两场食白果。自从阿根廷前锋阿古路离队後，领队哥迪奥拿经常派遣无锋阵，但当遇到对手主守时，要搵破关良方并唔容易。再者曼城现时仍然要应付英超同欧联，尤其联赛畀利物浦追到气咳，今场随时有所保留，但求赢波过关，唔会刻意大炒对手。

　　修咸顿前线哑火

　　「圣人」修咸顿近期状态麻麻，联赛先後不敌纽卡素同屈福特等下游分子，而且近3仗只攻入两球，一众进攻球员表现哑火。当然佢哋喺联赛同降班区仲有一段距离，争欧战资格又冇乜机会，不如喺盃赛博一博。可惜「圣人」一对前线拍档阿当岩士唐和查阿当斯都实力有限，今场面对曼城恐难有作为。翻查往绩，两队近5次交手，有4次开2球或以下，包括今季联赛两循环踢成0比0及1比1，今场唔慌多波入，中位数2.5球细盘值博。