今晚英超独脚戏，热刺主场迎战「太妃糖」爱华顿。热刺虽然近期「食神」上身估佢唔到，但爱华顿客场表现确实差强人意，加上佢哋呢排头头碰着黑，热刺可趁机止止血，主胜有计。

　　热刺可能系今季英超最估佢唔到嘅球队，佢哋可以勇挫榜首曼城，转过头又会输畀弱旅般尼，上周中更喺英足杯16强爆冷，加时畀英冠仔米杜士堡踢出局，延续自2008年后嘅锦标荒。不过热刺近4仗有条「赢」同「唔赢」嘅单跳走势，上仗赢唔到波，今仗随时嚟料。

　　另一边厢，爱华顿喺新帅林柏特上任后，未见有太大起色，佢领军6仗录得3胜3负，其中4仗联赛只得1胜3负，依家跌到落下游位置，降班危机日深。

　　除此之外，「太妃糖」被黑气缠身，箭头卡维特利云好番冇耐又伤，俄罗斯赞助商奥斯曼诺夫受到欧盟制裁，被冻结资产，而上仗联赛面对榜首曼城，全场打得唔错下却在末段失守，最惨系完场前明明对方中场洛迪卡斯简迪喺禁区犯手球，不过球证同VAR视若无睹，搞到最终输0比1，其后英超球证主帅莱利为咗呢单错判，私下致电向「林伯」耍冧，但未能改变冇分落袋嘅事实，黑到冇朋友。

　　卡尼老孙合璧靠得住

　　况且，爱华顿近8仗联赛客场出击，只得1和7负未赢过，包括输畀弱旅诺域治，每逢作客例脚软，好难顶得住哈利卡尼同孙兴民嘅英超最强攻击组合，主胜捧得过。