今晚意甲獨腳戲，國際米蘭主場迎戰沙蘭力坦拿，論整體人腳陣容及今季成績，國際米蘭的確遠勝對手，但「藍黑兵團」近期陷入低潮，近5場不勝，加上剛於周中意大利盃4強首回合同AC米蘭激戰完，下周中又有歐聯後顧之懮，實在難頂。聯賽包尾嘅沙蘭力坦拿為搶分護級，近期踢出超水准，連續4場打和，包括同AC米蘭踢成2比2，讓球主客和受讓兩球，可博讓球客勝。

　　國際米蘭近期連番受挫，近4仗僅2和2負未贏過，包括主場0比2輸畀薩斯索羅，以及喺歐聯16強首回合輸畀利物浦，加埋周中意盃4強同AC米蘭踢成0比0，國米已連續4場比賽冇波入。兩位射手迪斯高、拿達路馬天尼斯腳風欠順，上輪聯賽即使強攻排尾二嘅護級球隊熱拿亞，但最終只能互交白卷，表現令人失望；今仗遇上沙蘭力坦拿，隨時又陷入老鼠拉龜，無從入手嘅局面。

　　近況差仲要留力踢歐聯

　　「藍黑兵團」另一大隱懮係賽程太緊密，周中意盃大戰完AC米蘭後，下周中又要踢歐聯16強次回合作客利物浦，國米首回合輸0比2，為咗爭取晉級，今場聯賽可能會留力，實行集中火力對付「紅軍」。