今晚英超独脚戏，由阿仙奴主场硬撼狼队。阿仙奴近两仗联赛全胜，走出年头连场不胜嘅阴霾，今仗仲有加比尔马天尼利刑满复出，挟主场强势誓要击倒争前4劲敌狼队，主胜捧得过。

　　加比尔马天尼利复出添火力

　　阿仙奴踏入2022年一度5场不胜，好彩近两仗联赛反弹录得全胜，包括上仗喺球证作出多个不利判决下，仍以2比1击败宾福特。嗰场先开纪录嘅伊美路维，喺各项赛事攻入10粒，系继2009/10年度嘅法比加斯之后，首位达到呢个数字嘅球队青训产品。唔好忘记加比尔马天尼利坐完波监今仗可以出番，两位「争位劲敌」令到主帅阿迪达面对「幸福的烦恼」，不过「达Sir」强调伊美路维可胜任中前场多个位置，连同布卡约沙卡及马田奥迪加特，呢股青春风暴唔讲得笑。

　　狼队今季踢出稳健防守，配合鲁宾尼维斯、普丹斯及鲁尔占美尼斯嘅锐利反击，近7仗联赛获6胜1负。不过佢哋嘅打法略嫌被动，今季24场联赛只入23球，万一畀对手先开纪录，未必有能力收复失地，例如早排联赛主场围攻下，仍以0比1输畀打少个嘅阿仙奴。

　　阿仙奴依家落后第4位嘅曼联4分，但踢少3场，同时领先打多一场嘅狼队2分，若果今仗赢波，可免除狼队呢个后患并继续向曼联施压，加上近8次联赛主场赢咗6次，主胜有计。