今晚欧联16强首回合爆发大战，国际米兰主场恭迎「红军」利物浦。国米虽然喺意甲独当一面，但踢欧联成绩欠佳，反观利物浦近年属欧联争标分子，加上佢哋近4次欧联对意甲球队赢咗3次，包括今届分组赛「双杀」AC米兰，今晚再访「福地」圣西路，直取「红军」客胜。

国际米兰近年欧联成绩平平无奇，过去3届都系分组赛出局，今届终於打破魔咒杀入16强。睇番佢哋喺今届分组赛表现唔算突出，两循环对传统豪门皇马，都输波兼未能取得入球，能够出线好大程度上因为抽到好签，分组赛另外两支对手仅为舒列夫同萨克达，嚟到16强遇上2019年欧联冠军利物浦，想再进一步甚有难度。

国米近况跌Watt

再者国米近期状态跌Watt，连续两场联赛失分之後，已经被同市死敌AC米兰抢走联赛榜首之位，士气大受打击，加上王牌射手拿达路马天尼斯近期陷入球荒，中场主将尼高路巴列拿亦要停赛，情况更加唔乐观。

英超利物浦早前即使受到多位主力缺阵问题困扰，但成绩未受影响，而且愈战愈勇，近6场比赛全胜，中场法宾奴近期化身成为入球机器，今年已经入咗5粒，成为球队新进攻点。更何况两位射手穆罕默德沙拿及沙迪奥文尼参加完非国盃归队，夫添出击下令领队高普有更多选择。以利物浦今届分组赛6战全胜嘅强劲走势，有力反客为主，一於撑「红军」先拔头筹。