听朝世盃外南美洲区焦点战，智利主场遇上阿根廷。智利虽然要抢分，但中场悍将维达尔坐波监必有影响；阿根廷已获得出线席位，今仗摆明试阵为主，既然双方近年碰头少交收，捧2.5球嘅入球细好过。

　　维达尔坐波监智利有影响

　　先讲形势，智利依家排第6位，仅落後第4位嘅哥伦比亚1分，争入前4直接出线仍然乐观，佢哋世盃外初段演出低迷，但早前及时反弹3连胜，可惜上轮主场净吞厄瓜多尔两蛋之余，仲有悍将维达尔做埋「红牌阿姑」，被重罚停赛3场，中场扫荡力难免受削，今仗唔敢轻举妄动。而今季喺布力般流浪大勇嘅比尼顿，踏入2022年仲未「开斋」，现阶段都系要靠阿历斯山齐士孤军作战。

　　2哥阿根廷已经提早锁定出线资格，主帅史卡朗尼亦好识做，今次冇徵召美斯，畀呢位队长休息抖抖，而国米前锋祖亚昆哥利亚亦因伤退队，预计史帅会趁机试阵，啱啱好番嘅保罗戴巴拿及奥甘波斯，有机会夥拍拿达路马天尼斯攻坚，但效果成疑。翻查纪录两军近6次碰头，有5仗开2球或以下，今仗唔慌多波入，入球细有计。