周六凌晨德乙上演昇班大戰，漢堡主場迎戰「1哥」聖保利（白衫），兩隊周中喺德盃分別淘汰德甲球隊晉級，士氣高昂。不過今場漢堡疲兵出戰兼陣容不整，面對更具霸氣嘅聖保利難免處於下風，而且近年交鋒都係聖保利佔優，今仗放心捧客勝。

　　漢堡近4場聯賽3度失分，昇班爭奪戰突然大落後，而且球隊目前傷兵滿營，後衞華格路文、中場安斯蘇賀尼同麥斯羅亞最快都要2月先可以復出，嚴重影響球隊戰斗力。漢堡周中德盃互射12碼淘汰科隆，但球員經過120分鍾激斗，3日後又要面對強敵聖保利，球員體能肯定輸蝕，更加削弱搶分機會。

　　隊長艾維華傷愈復出
　　聖保利近3場聯賽都失分，不過仍然佔據榜首位置，周中德盃2比1擊敗多蒙特更令軍心大振，隊長兼後防重臣艾維華據報已經傷愈，有望作出今季聯賽首演，加上前線有德乙射手榜排第1位嘅古多貝斯托拿壓陣，入球能力有保證。聖保利過去5次同漢堡交鋒有4勝1和成績，「格食格」下有力再贏。