今晚非国盃D组尾轮埃及迎战苏丹。埃及表面上实力较强，但王牌穆罕默德沙拿今届表现麻麻，加上保守打法令攻力大减，而且今仗和波都够出线，对住死守嘅苏丹随时老鼠拉龟，宁捧2.5球嘅入球细。

曾7度染指非国盃嘅埃及有穆罕默德沙拿、艾利尼及马莫特查斯古特等英超兵助阵，被球迷寄予厚望，可惜首轮落笔打三更，以0比1不敌尼日利亚，其中沙拿成场波仅有一次攻门，演出犹如隐形，同佢喺利物浦嘅表现可谓判若两人，到次轮斗畿内亚比绍时，虽然靠佢一箭定江山赢1比0，但表现亦唔见突出。加上主帅奎罗斯排阵极之保守，有时甚至排出「5-5-0」阵式，更令沙拿无所适从，难怪埃及攻力咁疲弱。

睇番埃及目前喺D组两战得3分排第2位，领先畿内亚比绍同苏丹2分，就算今仗打和，而畿内亚比绍击败榜首尼日利亚，埃及亦可凭较佳对赛成绩出线，决心未必好够。

苏丹实力有限冇本钱抢攻

苏丹相隔10年後再度杀入非国盃决赛周，首轮先与畿内亚比绍互交白卷，次轮面对强敌尼日利亚即输1比3，证明实力有限，话就话今仗要赢波先有机会出线，但确实冇本钱抢攻。翻查纪录，埃及近6仗非国盃只入6球，全开2球或以下，细盘好路再追无妨。