周六凌晨英格蘭足總盃第3圈賽事，英超「1哥」曼城作客英乙球隊史雲頓，兩隊級數上嘅分野都唔需要多講，不過曼城想大勝似乎唔易，除咗領隊哥迪奧拿賽前確診未能領軍外，「藍月亮」今場起用大量新人，作客體力化嘅史雲頓相信入局需時，未必能夠喺早段主宰戰局，博1.5球嘅半場細係最佳選擇。

　　史雲頓體力化頂得嚇

　　曼城目前有唔少球員缺陣，馬列斯去咗踢非國盃，菲爾科頓、辛真高等確診球員上陣成疑，賽前更有主帥哥迪奧拿「中招」，可謂雪上加霜，而且球隊更重視下星期對車路士嘅英超爭標大戰，今仗會派出大量新人，據報18歲嘅卡基、19歲嘅高爾龐馬同21歲嘅佔士麥卡迪亞都會獲委以重任，雖然呢位小將都有一定質素，但面對體力化嘅對手難以實時入局。

　　睇番數據，曼城近4次喺英足盃對住非英超球隊，有3次半場總入球開1球或以下，好似上屆第4圈作客車頓咸，就喺半場踢成0比0平手。史雲頓目前喺英乙排第5位，日前由水晶宮借用嘅中堅積奧拜恩亦可以喺今場首演，有望鞏固球隊防守力，面對出副選同青年軍嘅曼城，半場可以頂得住，寧博1.5球嘅半場細。