今晚欧联E组最後一轮分组赛，西甲巴塞隆拿作客德甲班霸拜仁慕尼黑。巴塞要晋级16强，形势上许胜不许和，不过拜仁近年踢欧联分组赛，即使笃定首名出线，最後一轮都会尽力争胜，沙维回巢领军巴塞仲未执掂，拜仁肯定乘机打落水狗，让半一照捧上盘。

呢排球坛好兴讲球队DNA，好似曼联旧将艾拉，话新领队兰历克会搞坏曼联DNA，又好似巴塞咁，请番昔日中场大师沙维回巢执教，佢亮相记者会时亦讲，自己嘅巴塞DNA冇变，球队会回复控球然後制造机会。不过，巴塞要重建DNA，并唔系一朝一夕嘅事，皆因现时阵中球员并唔擅长踢传控足球，上场联赛主场倒灶不敌贝迪斯0比1，证明球队仲有排执。

巴塞争出线似安实危

巴塞现时喺E组以7分排次席，宾菲加5分紧随其後，表面上巴塞有优势，但由於佢哋对宾菲加只得1和1负，如果宾菲加今晚同时间主场对基辅戴拿模全取3分，巴塞就算和到拜仁，都会因对赛成绩较差出局，所以今场巴塞接近许胜不许和，但作客情况下要喺拜仁身上全取3分，唔系讲吓就得。

讲到球队DNA，拜仁嘅DNA肯定系「霸道」，由锺意尽揽天下兵器，被球迷笑称将德甲变成「拜甲」，到近年於欧联分组赛即使肯定出线，最後一场亦唔会留力，就系要威到尽。拜仁对上6届分组赛，全部踢完5轮後都肯定晋级16强，当中5届最後一场都照样赢波，今次仲要面对尽失霸气嘅巴塞隆拿，以拜仁球队DNA，即使今场要闭门作赛，主场肯定想大炒番场，令球队史册上有多一样威水嘢，所以唔需要担心拜仁因为出咗线而会留力，让半一都放心捧上盘啦！