澳職揭幕戰，墨爾本城主場對布里斯班獅吼，上季「雙料王」墨爾本城保留原有主力班底，包括射手佔美麥卡倫，實力有保證。反觀獅吼有主力流失，中場檀崎龍孔、後衞基利斯菲爾已經離隊，實力受到削弱，加上兩隊近4次對賽，墨爾本城取得3勝1負，有力旗開得勝，主勝值博。

　　墨爾本城同英超豪門曼城屬於同一個集團擁有，財力雄厚，兩年前簽入澳洲星級國腳佔美麥卡倫之後，球隊表現突飛猛進，呢位28歲前鋒入球率極高，過去兩季上陣49場聯賽共轟48球，換言之平均每場接近攻入1球。墨城上季26場常規賽攻入57球，冠絕各隊，成為奪冠嘅關鍵，佔美麥卡倫擔演最重要角色，球隊繼續有佢助陣，攻力就有保證。

　　獅吼主力流失難作惡

　　至於獅吼上季雖然打入季後賽，但首圈就被淘汰，實力不足以同「墨城」相提並論。何況獅吼今季有兩位主將離隊，其中檀崎龍孔上季射入9球，屬於獅吼首席射手，至於基利斯菲爾係防線支柱，兩人一齊離隊，勢令獅吼攻守能力都受到嚴重打擊，今場更加無力同墨爾本城抗衡，預料作客出擊難逃一敗。