「喜鹊」新时代第一击展开！最近获沙特阿拉伯财团收购嘅纽卡素，「易主」后首仗会喺主场圣占士公园迎战热刺。等咗咁耐新时代终于来临，球员同球迷当然异常兴奋，加上今仗系布鲁士执教生涯第1,000战兼可能系告别战，主场出击势必主动抢攻，面对守弱攻强嘅热刺，预料战情会非常开放，2.5球入球大稳开！

　　纽卡素新老板上场后，可以预视将会进行大规模换血，力图成为「新巴黎圣日耳门」，用钱打造金钻阵容，一众球员都要为自己前途而战，当中辛特麦斯明、祖连顿及祖尔韦洛克等攻击球员更要大展身手，希望有得留低。纽卡素今季7场联赛6场有入波，可见对比起条「豆腐防线」，佢哋锋力唔算差，要攻破热刺大门问题唔大。

　　盛传将被炒鱿嘅领队布鲁士，今仗会实现执教生涯1,000场里程碑，但呢场亦分分钟系佢喺纽卡素嘅最后一战，为咗令呢个特别日子有个美好回忆，布鲁士亦会以争胜做目标，喺圣占士公园球场「爆棚」嘅高涨情绪刺激下，「喜鹊」球员有望踢出超水平。

　　热刺哈利卡尼心急开斋

　　热刺上月英超一度连输3场，不过国际赛前喺欧协联同英超两连胜，总算及时「止血」。虽然英国传媒赛前爆料，指热刺有两位球员确诊新冠肺炎，有传系孙兴民同拜恩基尔，但都冇有怕，因为王牌哈利卡尼亦好心急争取个人今季英超第1球。事实上「哈神」对亲纽卡素都有好表现，单计近3次碰头「哈神」已入4粒，面对错漏百出嘅纽卡素后防，肯定系佢开斋好时机。而且热刺作客踢法开放，近4仗作客赛事总入球全开3球或以上，2.5球入球大属信心之选。