今晚世杯外欧洲区J组焦点战，德国作客北马其顿。德国日前反胜罗马尼亚，若果今仗赢波嘅话，就有机会成为首支取得下年世杯入场券嘅欧洲球队，况且「日耳曼兵团」首循环输过畀北马其顿，复仇心切必搏尽，加上客场出击例抢缰，半场客胜捧得过。

　　德国由新帅费历克领军后，取得世杯外4连胜，包括上仗醒目地换入汤马士梅拿，结果就凭呢位拜仁老将做救星于末段建奇功，以2比1反胜罗马尼亚。其实德国极速从谷底反弹，与费历克比前任教头勒夫更识得用「拜仁帮」有关，汤马士梅拿嘅入波，正系来自球会队友哥列斯卡妙传，而之前攻入扳平一球嘅亦系拜仁翼锋基拿比，配合佢哋熟到烂嘅4231阵式，难怪愈战愈勇。值得一提系为国家队上阵107次嘅汤马士梅拿，呢位32岁中场喺世杯决赛周已累积攻入10球，德国人之中，仅次于高路斯（16球）、早前逝世嘅拜仁名宿梅拿（14球）及奇连士文（11球），若然佢可以第4次出战世杯决赛周，就算未必破到高路斯嘅纪录，但要追平，甚至超越「轰炸机」奇连士文及梅拿，并非冇可能。

　　赢波复仇随时提早出线

　　依家德国7战取得6胜1负排J组榜首，已甩开次席北马其顿及第3位嘅阿美尼亚6分，只要德国今仗击败北马其顿，而同日阿美尼亚赢唔到罗马尼亚嘅话，就可以提早两轮杀入下年世杯决赛周，何况佢哋喺今届世杯外唯一输波，正正系首循环不敌北马其顿，无论为世杯入场券抑或面子，都肯定唔会放软手脚，战意必坚。

　　北马其顿虽然上仗大胜列支敦士登4粒，但对手太弱不足为据，而之前3仗世杯外全部打和，可见老将彭迪夫退出国家队，无论对实力或士气有一定影响。翻查纪录，连同上届在内，德国近8仗世杯外客场赢晒之余，全部都喺上半场取得领先优势，为免夜长梦多，今仗随时先发制人，半场客胜有计。