周四凌晨法甲又有快车，班霸巴黎圣日耳门（PSG）将会作客弱旅梅斯。呢场波PSG全取3分应该非常稳阵，事关圣日耳门要为欧联嘅密集赛程做准备，喺法甲采取速战速决嘅方式，务求尽早奠胜保留体力；梅斯战力薄弱，料难抵挡美斯领衔嘅超级锋线，一于捧半场客胜。

圣日耳门今季打造星级阵容，不过美斯、迪马里亚、韦拿杜姆等主将都年纪偏大，而且欧联分组赛展开后，更加需要照顾体能上嘅需要。喺法甲相对较易应付嘅赛事中，圣日耳门往往会先发制人，力求尽早锁定胜局，今季6场联赛全胜，当中就有5次半场领先，表现抢缰。

再讲，美斯上场畀主帅普捷天奴提早换离场，搞到两人「面左左」不特止，「球王」美斯更加系乜面都冇晒，今场点都要大踢争气波，省番靓招牌。

半场客胜啱做变倍器

对家梅斯开季6仗3和3负仲未开斋，今季势必卷入降班漩涡；面对实力超班、今季6战全胜嘅圣日耳门，肯定系难逃一劫。翻查往绩，两队过去4次交锋，PSG全胜并有3次半场领先，合共11个入球当中，有7球喺上半场轰入，可见梅斯无力招架圣日耳门强攻，客Ｗ冇肉食，让球客胜开到「-2」亦太冒险，倒不如追1.48倍半场客胜，当做过关变倍器就啱晒。