今晚西甲独脚戏，巴塞隆拿喺鲁营主场迎战CF格兰纳达。巴塞上周中欧联输得肉酸，主帅朗奴高文更被会长照肺，今仗一定要醒醒定定，不容再失，不过CF格兰纳达遇强必死守，巴塞要大捷绝对唔容易，宁捧3.5球嘅入球细。

　　虽然巴塞开季头3轮联赛，取得2胜1和尚算不俗，但上周中欧联遇德甲班霸拜仁即刻现形，最终喺主场惨吞3蛋，唔单止完全唔够打，主帅朗奴高文竟然派出发紧烧嘅佐迪艾巴打正选，备受质疑，赛后更畀会长拉波塔捉去照肺，甚至有传再有乜依郁随时被炒，气氛紧张。

　　巴夫韦迪长抖影响攻力

　　不过，朗奴高文其实有苦自己知，今夏巴塞接连放走美斯同基沙文，安素法迪、巴夫韦迪等主力仲前后受重伤，当中巴夫韦迪要抖4个月，而法迪虽或可赶及今场披甲，但抖咗差唔多成年，状态好难靠得住，换句话说，锋线只能靠新加盟嘅迪比同卢克迪庄，点都差啲，高文为保帅位，相信亦唔敢过于冒进。

　　格兰纳达头4轮联赛，只得2和2负未赢过，不过要留意，两场和波系对住维拉利尔及前列分子华伦西亚，证明佢哋面对劲旅玩死守呢招奏效。翻查纪录，格兰纳达之前3次造访巴塞，取得1胜2负，全开3球或以下，包括上季作客爆冷反胜2比1，可见佢哋防守唔错，3.5球嘅入球细捧得过。