今晚歐霸外附加賽次回合，芬蘭班霸赫爾辛基主場硬撼土超勁旅費倫巴治。費倫巴治有1球領先優勢，今仗一定先求穩陣，赫爾辛基雖然落後但欠缺強攻本錢，近3仗歐霸外全開半場和，不妨再追。

　　（周五凌晨零時開賽）

　　首回合雙方拉成均勢，打到下半場費倫巴治有王牌奧斯爾因傷退下火線，反而因禍得福，後備入替佢嘅甘姆斯卡耶立即建奇功，最終喺主場險勝1比0；雖然「大眼仔」日前喺土超已後備落場，傷勢冇乜大礙，但呢位早前先至開齋嘅中場狀態真係麻麻。

　　好彩係費倫巴治開季3場正式賽事贏晒，全部保持不失，防守固若金湯，而呢3仗上半場都同對手互交白卷，既然依家有領先優勢，今次客場打得保守啲亦無可厚非。

　　赫爾辛基風格慢熱

　　赫爾辛基係典型「山寨王」，於國內聯賽就蝦蝦霸霸，出戰歐洲賽多數於外圍賽已行人止步，不宜高估。睇番佢哋今屆3場歐霸外，只得1勝1和1負，而且全部開半場和，可見風格慢熱，就算依家落後緊1粒，想收復失地亦唔易，加上佢哋近5仗僅攻入6球，攻力一般，今場隨時又一次陷於膠着，半場和更值博。