睇好波咪走漏西甲，今晚上演開鑼揭幕戰由華倫西亞主場對基達菲，兩軍同樣季前易帥，最巧合係上季協助基達菲護級成功嘅教練保達拉斯，今季轉為執教華倫西亞，新球季首場就要領軍倒戈，佢對前東家基達菲實力瞭若指掌，勢必主攻力爭打響頭炮，直取主勝。

　　主帥倒戈摸清底細

　　現年57歲嘅保達拉斯之前執教基達菲5年，帶領球隊由西乙升上西甲，甚至為呢支二線球隊攞過歐洲賽入場券。不過，基達菲上季成績差劣，僅僅護級成功，保達拉斯亦被迫下台，轉投華倫西亞。換言之，基達菲現有班底都係由保達拉斯一手建立，對方有幾多斤両，佢自然一清二楚，今場交鋒，主場出擊嘅華倫西亞無疑佔得先機。

　　另一邊廂，基達菲請來皇馬名宿米高執教，佢曾於2009至2011年教過基達菲，當時球隊只能喺護級區掙扎。米高其後擔過任西維爾、奧林比亞高斯、馬賽、馬拉加、墨西哥球隊普馬斯教練。雖然米高曾經帶領奧林比亞高斯捧過希臘聯賽冠軍，但其餘執教成績都欠佳，實在令人懷疑佢能否令新季陣容變化不大嘅基達菲翻生，捧華倫西亞主勝為妙。