美洲金盃C组，牙买加对苏里南，今场喺美国奥兰多举行，牙买加多位球员效力美职球队，变相有半个主场之利，料可先拔头筹。

　　牙买加过往喺美洲金盃都有唔错表现，2015及17年获得亚军，上届打入4强，属于仅次于美国、墨西哥之后，美洲金盃第3势力。人脚方面，佢哋嘅主力大多喺美职搵食，包括费城联前锋哥尼布基、银河后衞奥尼尔费沙。牙买加仲有几位喺英格兰打滚嘅球员，包括富咸孖宝卜比列特同米高赫达，人脚赢晒。

　　苏里南人脚曳陪跑居多

　　苏里南曾经係荷兰殖民地，「橙军」史上有唔少名将係苏里南裔，包括古列治、列卡特、施多夫等。因此，苏里南球员如果有料到，都想做荷兰国脚，毕竟发展空间较大。搞到国家队人才凋零，上次参加金盃决赛周已经係1985年，预料今届只能陪跑。