今晚欧国盃头场，上演A组威尔斯对瑞士，今场喺中立场阿塞拜疆举行，威尔斯上届首次进身决赛周，就打入4强，但经过5年时间，球队人脚已经老化，翼锋加里夫巴利状态大不如前，连带球队整体攻力下降。瑞士属于守强攻弱嘅球队，佢哋上届欧国盃4场比赛，总入球都係2球或以下，首选中位数2.5球嘅入球细。

　　威尔斯拥有唔少着名球星，包括加里夫巴利、艾朗蓝斯、祖阿伦，但呢个「铁三角」已超过30岁，水准亦由高峰下滑。加里夫巴利、艾朗蓝斯喺球会只属后备，而祖阿伦仅效力英冠球队史笃城，恐怕难以重演上届佳绩。由于威尔斯一向採取稳守突击踢法，非常依赖加里夫巴利冲锋陷阵，佢无复当年之勇，要入波并唔容易。

　　至于新生代球员如丹尼尔占士、尼高威廉斯同哈利威尔逊虽然效力英超曼联同利物浦，但国际大赛经验不足，尤其喺首轮赛事随时会怯场，更加难以倚重。

　　瑞士一味靠守

　　至于瑞士因为本身实力有限，踢大赛往往以稳健防守同对手周旋，其中喺上届欧国盃3场分组赛仅入2球失1球，包括守和法国0比0，去到16强同波兰激战120分钟，仍然打和1比1，最终因为互射12码落败而出局。瑞士遇上同样守强攻弱嘅威尔斯，预料会係一场拉锯战，入球唔会多。