黄潜顾住欧霸放软手脚

　　西甲争霸最后决战，排次席嘅皇家马德里今晚主场迎战劲旅维拉利尔。皇马目前落后榜首马德里体育会两分，想衞冕成功要寄望马体会失分，皇马自己能够掌握嘅只係做好赢波本分，以佢哋主场威力，加上当决赛咁踢嘅必胜决心，有力早段击退「黄色潜艇」，半场主胜值得支持。

　　皇马上轮作客险胜毕尔包，总算继续向马体会施压，虽然主导权唔喺自己手上，但「银河舰队」仍会当今场係决赛咁踢，务求擸晒3分，再寄望同时间嘅马体会作客失分，咁就可以后上衞冕。事实上皇马近6场联赛主场获4胜2和佳绩，当中两场失分赛事都係喺欧联4强战前后，因为「分心」而出事，今仗皇马专心一意踢呢场生死战，自然可以踢出最佳水平，随时一开波就嚟料。

　　宾施马今季脚风大顺
　　皇马争胜最大本钱当然係宾施马，呢位法国射手今季西甲攻入22球，最近更阔别6年后重返法国队，人逢喜事精神爽，嚟到煞科战都会继续搏命，配合马高阿辛斯奥同云尼斯奥斯祖利亚，早段可望撕破对手防线，加上近6次联赛交锋，皇马有5次半场领先，证明好路。

　　维拉利尔目前排第7，虽然都要争欧霸盃资格，不过佢哋嚟紧有个更大目标，就係3日后上演嘅欧霸盃决赛，若然一举击败曼联，有冠军奖盃之馀更可直接取得下届欧联入场券，因此今场只係「次要」目标，随时连首席射手谢拉特摩兰奴都会收起，既然双方实力同决心出现差异，皇马有望半场就击溃对手，一于捧半场主胜。