今日下午澳職獨腳戲，包尾嘅紐卡素噴射機主場迎戰布里斯班獅吼。獅吼目前喺季後賽資格中身處「掹車邊」嘅第6位，但只領先第10位嘅西部聯3分，爭入季後賽形勢緊湊；由於獅吼近況跌Watt，預計今場會先求穩陣，半場和值得捧場。

　　噴射機回勇頂得住
　　獅吼上場輸畀阿德萊德聯後，近5場聯賽贏得1場咁大把，而且仲有後防主將賓迪爾修夫受傷，令本身已有艾德列及軒基特養傷嘅防線，更加天殘地缺，今場作客難免會以防守行先，尤其係上半場唔好先失波，以免被打亂陣腳。獅吼近5場聯賽有4場都開出半場和，其中3次半場互交白卷，預計今仗都會照辦煮碗，謀定而後動。

　　噴射機排緊包尾，近13場聯賽未贏過，季後賽肯定冇佢哋份，馀下賽事已成例行公事。不過佢哋近期起用多位年輕球員，反而偶有佳作，近兩仗先喺主場打和ＦＣ悉尼，上場面對中岸水手亦只係輸12碼而僅敗，可見戰意猶在，加上古度姆比斯同拿查連尼已傷愈復出，陣容齊整番，今仗面對獅吼唔會咁易被擊敗，半場和值得再追。