今晚英超早场有热刺主场对阿士东维拉。热刺数字上仍有一丝争取欧联入场券机会，当然唔会轻易放软手脚，而且射手哈利卡尼喺神射手榜领先，定必加倍努力寻找「士哥」；维拉无欲无求，而且近6次对热刺全败，热捧主胜。

今轮开赛前，截至周二热刺同第4位嘅车路士相差5分，亦落后利物浦4分，联赛仲有两轮，即使欧联入场券未必能够到手，但仍然要积极抢分，希望保住欧霸或者下届新增嘅欧协联资格，所以肯定唔会手软。

上轮热刺主场以2比0击败狼队，前锋哈利卡尼射入1粒，累积22个英超入球，喺射手榜同利物浦嘅穆罕默德沙拿并列榜首，呢名英格兰射手一向斗心极强，2018年为咗争神射手，曾经用自己囡囡条命发誓，话其中一个热刺入波应该入佢数，可想而知哈利卡尼对神射手名衔几咁着紧，今季当然希望独佔鳌头。事实上，维拉係热刺同哈利卡尼嘅「私房菜」，近6次交手热刺全胜，「哈神」更合共射入6球。

基亚利殊撑唔起维拉

维拉虽然上仗有养伤多时嘅中场基亚利殊伤愈，以后备姿态上阵，但佢哋作客仍然以2比3不敌水晶宫，近7场联赛只得1胜2和4负，斗心麻麻。维拉喺基亚利殊养伤期间，进攻侵略性不足，难以转化成入球，即使复出相信状态都未足，今场难免被睇低一线，热刺主胜热得有道理。