小將爭氣戰績上揚
　　今晚英超獨腳戲，阿仙奴主場迎戰「拖肥」愛華頓。愛華頓傷兵滿營下，近5場聯賽未贏過，尤其係箭頭卡維特利雲缺陣影響甚大，前線冇人擔到大旗，阿仙奴小將加比爾馬天尼利難得擔正必搏盡，近年主場出擊又食住「拖肥」，主勝好路。

　　阿仙奴目前排聯賽第9，爭前7嘅下屆歐洲賽資格機會一般，不過巴西射手加比爾馬天尼利自從近兩仗聯賽復任正選後，表現漸入佳境，更喺大勝錫菲聯3比0之役開齋，上仗逼和富咸亦表現活躍。由於拿卡錫迪受傷，隊長奧巴美揚只係啱啱好番未弗，隨時為下周中歐霸4強首回合造訪維拉利爾避戰，因此馬天尼利今場好大機會移入中路，一定趁機爭取入波，向主帥阿迪達證明自己打中鋒一樣冇問題。

　　愛華頓傷兵成籮
　　反觀作客嘅愛華頓傷兵多到成疋布咁長，包括安祖高美斯、杜哥利、耶利文拿等主力，連射手卡維特利雲都傷埋，雖然佢唔及季初咁搶鏡，但無論起用李察利臣或伊禾比，都係敗家到暈，搞到中場核心佔士洛迪古斯踢得勁辛苦，足見利雲嘅門前把握力，對「拖肥」堅重要，難怪近5場聯賽只得3和2負，陣容天殘地缺，主帥安察洛堤想變亦神仙難變。

　　翻查紀錄，連埋盃賽在內，阿仙奴近7次主場迎戰「拖肥」，全部贏曬，擺明格食格喇，加上今場對阿仙奴嚟講，擊敗排佢哋前面1名、只有3分差距嘅愛華頓，對爭取歐洲賽資格有莫大幫助，相信「兵工廠」定必搏到盡，主勝值得捧場。