3中堅陣式掂
　　周五澳職有FC麥克阿瑟主場迎戰布里斯班獅吼，主隊3連勝後殺上聯賽榜第3位，唔只重拾狀態，教練米列錫調整防線起用3中堅，亦成功回復防守穩定性，今場迎戰澳職失球第2少嘅布里斯班獅吼，相信會係一場以防守決勝負嘅賽事，預料入球唔慌多，開2.5球入球細機會頗高。

　　澳職新軍FC麥克阿瑟雖然有達比舒利等星級攻擊球員，不過球隊今季一直以防守力強見稱，澳洲兩大老牌國腳費達歷斯同米利根統領嘅後防極為可靠，但經歷3月初2場共吞5蛋後，球隊立即改用3中堅穩定後防，近3場聯賽全勝兼只失1球，今場將會繼續沿用呢個成功戰術應戰。

　　獅吼守強攻弱
　　布里斯班獅吼開季5戰4勝氣勢強勁，但近8場聯賽卻未逢1勝，雖然目前沉淪第8位，但15個失球只比上季王者FC悉尼多，可見球隊防守力仍然強勁。

　　獅吼目前最大問題係入球能力差勁，主力前鋒史葛麥當奴受傷係重大打擊，日本前鋒工藤壯人狀態亦令人失望，加盟以來仲未開齋，既然佢哋守強攻弱，近8場聯賽有7場總入球為2球或以下，捧細盤好路。