欧联8强首回合开打！今晚重头戏係13届冠军皇家马德里主场斗利物浦。皇马3年前于决赛击败「红军」捧盃，不过「银河舰队」队长沙治奥拉莫斯今仗因伤缺阵，今季施丹变咗「稳阵先生」，预料今场亦会加强防守；高普带领嘅利物浦喺欧联演出亦稳打稳扎，8场比赛有6场保持不失，7次总入球开2球或以下，首选2.5球入球细。

　　相比3年前于欧联决赛交锋，皇马嘅「BBC」组合依家只剩低宾施马，不过呢名法国前锋今季于各项赛事射入24球，佔皇马总数68球超过3分1，重要性比3年前有过之而无不及，但换个角度睇，佢一旦被对手箝制或表现失准，锋力无可避免大受影响。

　　拉莫斯缺阵施丹更保守
　　「银河舰队」今届欧联头3轮分组赛失7球，一度陷出局边缘，主帅施丹当机立断改变战术，先巩固后防再搵机会打反击，成功喺之后5场欧联取得4胜，当中16强首回合作客小胜阿特兰大1比0就係最佳例子。皇马今场有队长沙治奥拉莫斯因伤缺阵，防线不整，预计会同16强一样，首回合先谋定而后动。

　　利物浦今季饱受伤兵困扰，英超表现反覆，近9场联赛仅得3胜6负宣告衞冕失败，不过佢哋踢欧联又係另一回事，今届8场欧联获6胜1和1负，当中6场保持清白身，除咗喺分组赛作客大胜阿特兰大5比0外，其馀7场欧联全开2球或以下，入球及失球数字皆偏低。事实上「红军」领队高普近期安排番法宾奴泰华利斯踢中场后，大大增强扫盪力，同时减轻后防压力，近3仗就成功保持不失球，今场一于追入球细。