欧洲区G组第3轮，黑山主场硬撼挪威。黑山开局2连胜入6球，全因赛程有利，对完同组最弱两队之后，今仗火併实力高一个档次嘅挪威，将遇上真正考验；挪威上仗惨吞土耳其3蛋，几位新星艾宁夏兰特（图）、马田奥迪加特备受压力，誓要打翻身仗，随时同黑山斗攻，中位数2.5球入球大捧得过。（周三凌晨2时45分开赛）
　
　　黑山两战全胜睇落好劲，但其实只係赛程编排嘅结果。黑山首两仗分别击败拉脱维亚及直布罗陀，两个对手都係去年欧洲国家联赛嘅D组级别球队，身为C组级别嘅黑山赢波係好应该，不过该队灵魂「黑山老妖」祖维迪脚风顺亦係事实，呢位前锋近3场国际赛攻入4粒，包括作客2比1赢拉脱维亚一役梅开二度，今仗对住不稳嘅挪威防线，随时再有波入。

　　抢分出线唔衰得

　　G组出线资格理论上係荷兰、土耳其、挪威之争，挪威上仗主场对土耳其输0比3，对争取出线打击甚大，不过依家唔係哭波丧嘅时候，最重要係尽快赢番波，而且对手黑山经历2连胜后士气高昂，加上主场出击，今场绝对係硬仗。近年冒起嘅艾宁夏兰特与马田奥迪加特，今届外围赛仲未入到波，相信佢哋会把握今场国际赛档期最后机会，搏尽抢攻。黑山当起，挪威就搏命求翻身，今仗碰头将会係斗攻格局，入球大好路。