新一季日職今日開鑼，打頭陣上演「神奈川打吡」，衞冕球隊川崎前鋒主場迎戰前季盟主橫濱水手。前鋒上季連奪日職及日皇盃，上周捧走日超盃，強勢持續，水手喺兩大主力艾歷利馬及祖利亞山度士相繼離隊下，球隊進入重建期，同如日方中嘅前鋒冇得比，水手上季兩負前鋒，今仗更加冇得打，開鑼日睇好前鋒旗開得勝。

　　前鋒今季保留上季8成冠軍人馬，再從名古屋鯨魚簽入巴西中場祖奧舒密特，以及從福岡黃蜂收回遠野大彌等，配合原有嘅李安度達美奧、小林悠、三笘薰等骨乾，陣容進一步強化。球隊季前到沖繩集訓，踢熱身賽以5比1輕取水戶蜀葵、6比1勝北九州向日葵，以及14比3大炒北海道札幌岡薩多，上周日本超級盃對大坂飛腳，憑三笘薰起孖及小林悠絕殺贏3比2，多位攻擊球員都有好表現，值得信賴。

　　水手鐵三角走剩一個
　　水手前季奪冠後，上季過度擴軍反而令球隊失去重心，其快速進攻踢法無從發揮，短短半季就被前列遠遠拋離衞冕無望，最終以第9名完成賽季，亞冠盃亦於16強出局，上季各自攻入13球嘅兩大主力艾歷利馬及祖利亞山度士相繼離隊，巴西鐵三角得番馬高斯祖利亞，佢今季就要同仲川輝人合作搵食，進攻能力大幅減弱，今季預計只能繼續留喺中游徘徊，點同前鋒斗？

　　雙方上季兩度交手，前鋒都力挫對手，兩場都贏3比1，前鋒今季朝著5年內第4個聯賽冠軍邁進，開鑼首戰相信可以頭威頭勢，贏波立威，主勝捧得過。