志切争标首回合即抢
　　今晚欧联16强首回合重头戏，巴塞隆拿主场硬撼巴黎圣日耳门（PSG）。巴塞于联赛争标机会麻麻，势必集中火力攻欧联，撞正PSG王牌*因伤无缘倒戈，明显有运行，加上近年主场出击食住PSG，今仗有力抢先机，主胜值得捧场。

　　巴塞之前联赛表现欠稳，虽然近7仗联赛全胜明显回勇，包括上场大胜艾拉维斯5比1，但因榜首马体会亦keep住赢波，令佢哋继续落后8分兼打多1场，争标形势唔太乐观。「地上最强」上周中喺西盃4强首回合又淨吞西维尔2蛋，要反败为胜亦非易事，因此欧联便成为该队争冠最大目标。事实上，巴塞今届欧联表现唔错，6场分组赛取得5胜1负，队长美斯只出战4场已入3粒，唯一败仗係提早锁定晋级资格下，于尾轮一时大意输畀祖云达斯，搞到只获次名出线。

　　碧基狂谷状态有望复出
　　赛前巴塞更收到好消息，佢哋因伤缺阵近3个月嘅中坚碧基，两个礼拜前已复操，最近仲加大训练量，摆明谷状态喺呢场大战复出。今季呢支西甲劲旅有多位后防球员轮流受伤，上场联赛对艾拉维斯，中场法兰基迪庄客串中坚位置，碧基复出唔止可以令防线更稳阵，亦可以释放迪庄，畀佢返回中场，呢位荷兰国脚今季表现大勇，各项赛事已入6球，佢踢中场可以提升攻力，巴塞赢面更大。

　　PSG*迪马利亚养伤
　　PSG喺今届头3场欧联2负嘅劣势下，最终连赢3场力压曼联惊险出线，但上年年尾无喇喇炒咗主帅杜曹，改由前热刺主帅兼球队名宿普捷天奴接手，需要重新磨合。更不幸嘅，係王牌*于早前法足盃受伤要抖4周，肯定无缘倒戈，冇咗呢位今届欧联已入6球嘅射手，对进攻影响甚大。祸不单行係中场迪马利亚及马高华拉堤都有伤在身，势必令基利安麦巴比孤掌难鸣。翻查纪录，巴塞近3次欧联主场迎战PSG赢晒，包括上次大胜6比1，两回合计反胜6比5缔造经典大逆转，阵容不整嘅PSG重临凶地难逞强，主胜捧得过。