今晚頭場賽事戲碼係韋斯咸對錫菲聯，兩隊近況都唔差，「錘仔幫」季初表現一鳴驚人後，近排開始走下坡，另一邊廂，錫菲聯亦愈踢愈有，近9場賽事贏6場，球員信心回復，呢場五五波之爭，相信半場未必有交數，捧半場和啱數。

　　未計周日賽事，韋斯咸排第6，失分少過排第4嘅利物浦，爭取歐聯入場券唔係癡人說夢，當然，難度亦甚高。「錘仔幫」踏入2021年後，連盃賽取得6連勝，咁當然，呢6場對手係冇傳統Big 6球隊在內，其實競賽水准唔算十分高。

　　再睇番之後4場，韋斯咸先喺主場不敵利物浦1比3，跟住作客贏維拉3比1，近兩場賽事分別喺聯賽作客富咸同英足盃作客曼聯，法定時間都只係踢成0比0，英足盃更被曼聯加時淘汰，累積4場只得1勝，4場賽事半場全部同對手互交白卷。

　　錫菲聯近況穩步上揚
　　錫菲聯同樣係進入2021年轉運，最近9場6勝3負，3場敗仗只係1比3不敵熱刺、0比1輸畀曼城同作客車路士輸1比2，戰績絕對見得人，上周英足盃亦擊敗布里斯托城順利晉級8強，球員信心回復，雙方近踢法相近，近2次交手半場同樣踢成0比0，相信今場情況相若，不妨再追半場和。