今晚上演意盃4强次回合，祖云达斯主场再斗国际米兰。国米首回合输1比2，某程度同射手卢卡古停赛有关，呢名比利时国脚今场可以复出，国米反胜本钱大大提升；祖记王牌基斯坦奴朗拿度（C朗）求胜心强，盃赛亦唔会放软手脚，今场拣2.5球大最稳阵。（周三凌晨3时45分开赛）

　　卢卡古复出图收复失地
　　国米首回合主场以1比2输波，好大原因同卢卡古停赛有关，据外国传媒报道，自从卢卡古上季加盟国米以来，至今上阵78次国米赢咗48场，胜率达61%；相反佢冇出场嘅7场比赛，国米仅得2胜，胜率急跌至29%，如果国米今场想赢波收复失地，卢卡古绝对係最大关键。

　　此外今季新加盟同样有出色表现嘅右翼衞阿舒拉夫，亦告刑满复出，令国米前线进攻更多元化，就算「智利孖宝」阿历斯山齐士及维达尔今场齐齐坐波监，相信教练干地都会主动抢攻。

　　祖云达斯首回合凭王牌C朗拿度包办两个入波，先拔头筹，呢名刚踏入36岁嘅葡萄牙射手，斗心有几强唔使多讲。佢喺上场联赛对罗马亦攻入一球，带领祖记喺各项赛事连赢6场。更何况祖记仲有艾华路莫拉达、费达历高基艾沙及古路施夫斯基等好波之人，万一主帅派路畀C朗休息，祖记火力依然有保证。

　　睇番祖记今届3场意盃法定时间总入球全开3球或以上，相信今场唔会例外，吼2.5球大好路。