锋将跌Watt难炒般尼
　　今晚英超快车尾场，衞冕嘅利物浦主场对般尼。「红军」利物浦陷入前所未有嘅入球荒，近3场联赛全部食白果，以穆罕默德沙拿为首嘅「埃及文明」锋线死晒火；般尼一向守强攻弱，惯性靠死守抢分，遇着近4场联赛全开两球或以下嘅利物浦，中位数2.5球入球细有分头，值得捧场。

　　利物浦喺上场联赛「双红会」同死对头曼联互交白卷，连同之前0比1作客输畀修咸顿、作客纽卡素踢成0比0、主场被西布朗逼和1比1，近4场联赛未赢过，从榜首跌到落第4位。最严重问题，係「红军」连续3场联赛都冇波入，陷入348分钟入球荒；翻查纪录，佢哋上次连续3场联赛食白果，已经係2005年3月嘅事，非常罕见。

　　原本令列强闻风丧胆嘅「埃及文明」锋线穆罕默德沙拿、沙迪奥文尼及罗拔图法明奴，最近状态真係沉到爆，近4场联赛只有文尼曾射入1粒，之前弗爆嘅迪亚高祖达又未好番，好彩利物浦后防尚算稳健，近5场联赛只失1粒，客串中坚法宾奴泰华利斯已成为定海神针，防线令人放心。

　　般尼攻力英超最弱
　　依家喺下游挣扎嘅般尼，攻力係全英超最弱，17场联赛入得9粒咁大把，係今季英超唯一入波个位数球队，仲衰过包尾嘅锡菲联。有见及此，般尼惟有刻意摆铁桶阵，务求不致多失，佢哋近8场联赛7次开两球或以下，其中3场更保持清白之身。自从门神尼克普比伤愈复出后，防线确係稳阵咗好多，加上近两仗联赛输波，为抢分护级，对住近4场联赛全开两球或以下嘅「红军」，一定继续龟缩，2.5球入球细有买趁早。