主场打仁例多波入

今晚德甲续演快车，榜首拜仁慕尼黑作客斗奥格斯堡。奥格斯堡整体实力虽不及拜仁，不过近年喺主场迎战呢支班霸都冇怯场，经常大踢进攻足球主动求胜；拜仁今季后防表现失准，惟有进一步加强进攻填补防线漏洞；既然「奥堡」近6次联赛主场对拜仁全开4球或以上，一于捧中位数3.5球大盘。

奥格斯堡近况认真麻麻，上场联赛以0比2不敌云达不来梅，联赛连盃赛近5场输4场，而且自从去年10月尾喺主场击败缅恩斯后，佢哋对上6仗主场只得2和4负，今场要喺拜仁身上抢分难度极高。不过佢哋近6次联赛主场对拜仁只有1次冇入波，总入球全部开4球或以上，充满大无畏精神，而且球队上季中起用前多蒙特名将、曾经执教利华古逊嘅靴列治领军后，踢法变得更为进取，今季联赛主场就曾经杀败劲旅多蒙特，今场唔怕继续与拜仁斗攻。

拜仁作客防线曳

拜仁踏入2021年作客接连失利，先喺联赛2比3输畀慕逊加柏，德国盃第2圈对住乙组仔基尔更加倒灶出局。虽然上场联赛主场以2比1险胜弗赖堡，但后防欠稳问题依然未改善，以佢哋今季8场联赛作客场场有失波、共失14球嘅水准，今场睇怕难保清白之身。

拜仁防线虽然跌Watt，好彩王牌前锋罗拔利云度夫斯基依然保持高效，今季联赛已轰入21球，打破咗德国传奇射手梅拿保持嘅半季入球纪录，依家正向单季攻入40球嘅联赛最多入波纪录进发；既然两军同样攻强守弱，相信今场会有唔少入波出现，捧3.5球入球大最好路。