今晚另一场意甲重头戏，拉素主场迎战「紫百合」费伦天拿。拉素箭头恩莫比尼持续勇态，相反费伦今非昔比之馀，近3次作客拉素更录全败劣绩，今场预计都係凶多吉少，热捧主胜。

拉素今季联赛战绩虽然不及上季，不过依家仍排联赛榜第9位，加上成功杀入欧联16强，对呢支板櫈深度一般嘅首都球队嚟讲，已经算係唔错成绩。上季欧洲金靴奖得主兼意甲神射手恩莫比尼保持水准，即使一度因为确诊新冠肺炎缺阵，但13次联赛上阵轰入10球，效率奇高，绝对係拉素入波保证。另外，中场线由路尔斯阿拔图发动组织，不时作出致命传送，亦令拉素进攻战术上更加立体，今次主场出击，胜算当然更高。

「紫百合」攻力唔掂

另一边厢，费伦天拿歇冬前虽曾爆大冷3比0击败祖云达斯，但要留意「紫百合」该仗佔大部分时间多踢1人，计埋上场主场只能同博洛尼亚打和0比0，近10场联赛只得1胜5和4负，合共只入6球，表现差强人意，尤其係季初卖走费达历高基艾沙后，老将列贝利显得独力难支，就算有柏兰迪利回巢执教，巧妇难为无米之炊，相信帮助亦不大。睇埋对赛往绩，双方近6次碰头，拉素录得5胜1和，其中近4次交手恩莫比尼都有士哥，称得上係「紫百合」剋星，今场捧主胜冇甩拖。