曼联中场 般奴费南迪斯

　　主场例变软皮蛇

　　今晚英超圣诞新年快车有死敌对决，曼联主场火併列斯联。虽然红魔作客龙咁威，但返主场就变番软皮蛇，初段总係老鼠拉龟冇碇埋手，遇上同样慢热嘅列斯联，随时陷于胶着状态，半场和值得捧场。

　　仇人见面唔敢轻举妄动

　　曼联于上周中英超快车，延续客场神勇演出，反胜锡菲联，今季联赛作客6场赢晒之馀，仲要全部反胜，连同上季在内，创下队史联赛客场10连胜等纪录，真係客场一条龙。可惜，佢哋返回主场则差天共地，单计联赛，今季6次主场出击赢得1场咁大把，仲要係险胜弱旅西布朗1比0，其中近4次联赛主场全开半场和，初段踢得劲立油。

　　上世纪90年代英超诞生之前1季，即1991/92年度球季，列斯联就係力压曼联勇夺英甲（当时英格兰顶级联赛）冠军，但翌季佢哋竟然将王牌简东拿卖畀红魔，直接壮大死敌缔造王朝，双方劲多牙齿印，因此仇人见面分外眼红，列斯联事隔26年重返英超，今遇死敌一定搏甩髀。

　　不过列斯联「狂人」教头比尔沙嘅疯狂进攻打法，逐渐被列强睇通后，走势明显回落，近5场只得2胜1和2负，而且全部开半场和，相信今仗造访死敌亦唔敢轻举妄动，半场和更可取。