英超开快车，第1场就有联赛锦标争逐分子车路士作客狼队！自从箭头鲁尔占美尼斯受伤后，狼队攻力弱上加弱，今场仲有摩天奴停赛，连转守为攻嘅摩打都冇埋，反观「车仔」中前场人才鼎盛，老将基奥特近期状态回勇，今造访「私房菜」狼队，车路士1.56倍客胜热得有道理。

　　今季英超争持激烈，虽然「车仔」上仗作客0比1不敌爱华顿，但利物浦同热刺亦齐齐和波失分，车路士冇畀对手拉开太大积分距离，现时只落后榜首双雄3分，以佢哋雄厚嘅兵源，打长途战有着数。

　　「蓝战士」虽有薛耶治及赫臣奥杜尔受伤，但基斯甸普列锡及夏维斯已经复出，中锋谭美阿巴谦同基奥特轮流踢正中锋都搵到食，其中季初受冷落嘅基奥特近期状态大勇，上场斗爱华顿，「银河唯一」以正选姿态登场虽然食白果，不过「车仔」落后下换入谭美阿巴谦踢双塔阵，抢番唔少攻势，未能扳平只係欠运。翻查纪录，车路士近8次对狼队，豪取6胜1和1负，由于上场不敌爱华顿，预计由林柏特领军嘅车路士知耻近乎勇，今场造访「私房菜」狼队，绝对係反弹好时机。

　　狼队一向主打稳守突击，防守刻意缩后求稳，配合艾达马查奥尔及鲁尔占美尼斯打快速反击，近两季都非常成功。不过前线过于倚赖鲁尔占美尼斯数胡亦係问题所在，呢名墨西哥射手今季联赛只入4球，脚风已经唔多顺，早前斗阿仙奴头部重创，需要养伤到下年，顶替佢位置嘅法比奥施华明显未适应，未能取得奇兵效果。

　　艾达马查奥尔有勇无谋
　　「大隻佬」艾达马查奥尔得个「勇」字，联赛仲未开斋，原本已经唔太锐利嘅狼队锋线，入球数字再向下，而且上场连阿士东维拉都守唔住，畀对方绝杀，狼队近5场赢得1场咁大把唔係冇原因，今场仲有中场摩天奴坐波监，就算有地利亦难乐观，车仔热Ｗ趁早买。