利物浦射手穆罕默德沙拿

　　红军抢缰杀无赦！英超盟主利物浦周一凌晨作客护级分子富咸，「红军」早前经历伤兵大灾难后，球员似乎已经开始适应新阵式，一众临危受命嘅小将都有出色表现，令球队已回复班霸本色。主队富咸虽偶有佳作，但面对火力强大嘅劲旅，防线仍然形同纸扎，经常早段失球陷入苦战，今场捧利物浦半场客胜。

　　利物浦伤兵众多，包括球队正选华基尔云迪积克、祖高美斯同堤亚高艾简达拿，不过「红军」经过适应期后渐趋稳定，上星期就喺主场以4比0大胜狼队，门将基利靴、右闸尼高威廉斯及中场居迪斯锺斯等小将，只要有机会上阵都能够交出好表现，可见利物浦板櫈深度相当充足。赛前消息仲话中场阿历士张伯伦同门将艾利臣比加都有机会复出，实力如虎添翼。

　　事实上，即使荷兰中坚华基尔云迪积克受伤，利物浦近6场亦只失4球，防守能力未见受到削弱，而且球队入球力量相当充裕，近4场联赛都能够先开纪录，上场欧联作客米迪兰特，早已锁定首名出线嘅「红军」以1比1赛和对手，穆罕默德沙拿开赛仅55秒即闪电入波，状态大勇。

　　富咸「纸扎」防线早段易失守

　　另一边厢，富咸今季5场联赛主场4度落败，除咗击败弱旅西布朗一仗，其馀4仗均被攻入至少2球，而且4场都係喺上半场就落后，早段防守集中力有极大问题，对住火力冠绝英超嘅利物浦，随时连半场都顶唔住。