生死战趁地利丧攻

今晚欧联「死亡B组」瞩目一战，皇家马德里喺二队迪史堤芬奴球场火併慕逊加柏。「银河舰队」依家屈居小组第3，不过今场只要赢波，就唔使理同组另一场赛果，肯定出线，加上箭头宾施马复出，必定攻到你气咳；慕逊加柏同样重攻轻守，法国孖宝柏利亚及马古斯杜林脚风甚顺，斗攻格局捧2.5球嘅入球大。

皇马今届欧联好似坐过山车咁，头2轮仅得1分初现危机，之后双杀国米，本来谂住出线冇问题，点知上轮作客又爆冷输畀萨克达，依家落后榜首慕逊加柏1分，同萨克达一样手握7分，不过因两次交手都输波而排紧第3。若果同组另一场国米击败萨克达嘅话，皇马今场只需打和，就可同慕逊加柏携手出线。

查实「银河舰队」仲叫掌握晋级主动权，今场只要生生性性全取3分，就肯定晋级16强，巴西小将云尼斯奥斯祖利亚同洛迪高高斯喺今届欧联屡做奇兵，经验丰富嘅宾施马及沙治奥拉莫斯亦及时复出，为免连续23年出线欧联16强嘅优良传统断缆，必定主动抢攻，务求赢波出线。

慕逊加柏孖宝劲弗

头4轮获得两胜两和嘅慕逊加柏，上轮畀国米打破不败之身，虽然今场和波亦够出线，但呢支德甲劲旅踢法有前冇后，今届欧联5战入16球失7球，未计今轮，同拜仁及巴塞并列欧联火力最强球队，小组5仗全开3球或以上，不容少觑。单计法国前锋孖宝柏利亚及马古斯杜林就合共入咗7粒，连同队长史甸度喺中场做支援，论进攻可能更胜皇马，为咗出线梗係踢番最耍家嗰瓣，捧2.5球嘅大盘最划算。