今晚欧国联A2组大战，1哥比利时主场硬撼英格兰。比利时队长夏萨特因确诊新冠肺炎而落选，对进攻有一定影响，「三狮兵团」今届4场欧国联入得3粒，踢得坚保守，加上近年碰头经常少交收，2.5球嘅入球细乃不二之选。

　　之前一直受伤嘅夏萨特，早前喺皇马复出逐渐上力，并获比利时召入，点知冇耐证实确诊新冠肺炎，无奈退队。虽然「欧洲红魔」人才济济，但真正喺进攻孭到飞嘅大佬，都係得夏萨特、奇云迪布尼、卢卡古3个，如今「夏神」中招，卢卡古又啱啱先好番，迪布尼要一个人孭重飞，但佢状态唔算特别好，对进攻有一定影响。

　　阿诺特福仔退队影响大

　　英格兰日前搵爱尔兰拍跳大胜3粒，但呢班波踢冇包袱嘅热身赛就叻，当出战正式比赛又变得保守。单计今届4场欧国联，英格兰只得2胜1和1负，入得3粒咁大把，其中3场开2球或以下，上轮输畀丹麦0比1非常攞命，搞到依家与丹麦同分，落后比利时2分，若果今仗赢唔到，想杀上首名取得出线资格，机会微乎其微，加上阿历山大阿诺特、拉舒福特因伤退队，对攻守都有影响，以主帅修夫基咁鬼保守嘅性格，为免先失波陷于被动，梗係唔敢乱攻。

　　何况双方近4次交手，有3次开2球或以下，比利时上次造访英军赢形势下输波，吸取教训后，唔似会空群而出抢攻，捧入球细更稳阵。