厄瓜多尔阵容星味远胜玻利维亚。

　　另一场世盃外南美洲区赛事，玻利维亚主场硬撼厄瓜多尔。玻利维亚以往嘅高原主场威力，近年明显减弱，何况厄瓜多尔都习惯高原比赛未惊过，加上近年世盃外都食住玻利维亚，今仗有力赢波而回。

　　近10次交手未输过
　　玻利维亚以往喺3,673米高原主场出击，强如巴西及阿根廷，去到佢哋主场都吃尽苦头，踢到气都抖唔到。不过呢种优势，近年开始冇咁明显，尤其係正式赛事，单计世盃外围赛，玻利维亚近10次主场出击，只得4胜3和3负，包括上仗对阿根廷反输1比2，高原威力开始下降。而且玻利维亚冇乜新星冒起，除咗倚赖老将马些路摩连奴数胡外，仲有1名已41岁嘅前锋卡路士沙奥斯度入选，真係青黄不接，头2轮世盃外输晒，有办你睇。

　　厄瓜多尔嘅主场同样位处高原，因此造访玻利维亚唔会唔习惯。头2轮世盃外获1胜1负嘅厄军，阵容远较玻利维亚平均，由经验丰富嘅队长安拿华伦西亚、阿历山大杜明基斯、连拿度伊巴拉领军，亦有干沙路柏拉达、安祖文拿、米高艾斯查达等新星上位，其中效力士砵亭嘅20岁前锋干沙路柏拉达，6次为国披甲已有2球进帐，包括上轮勇挫乌拉圭4比2亦有士哥，前途无限。

　　翻查纪录，双方近10次喺世盃外碰头，厄瓜多尔取得8胜2和未输过，明显格食格，就算作客亦未惊过。