力求打破国际赛5场不胜颓势嘅土耳其，今晚热身赛主场对「格仔军」克罗地亚。土耳其领队根尼斯去年上任后进行大换血，召入唔少好波兼当打球员，经过磨合已经建立默契，赢唔到只係欠运；克罗地亚入得又失得，近7战全开3球或以上，今场预计会多入波出现。

　　耶斯斯状态大勇

　　根尼斯为应付嚟紧2场欧国联主场斗俄罗斯及作客匈牙利，今次召入大量实力球员，包括李斯特城前锋辛基斯安达、祖记后衞美列迪美罗及里尔射手耶斯斯等。耶斯斯啱啱喺2场欧霸盃作客都连中三元，属欧洲赛史上首人，弗到冇朋友，加上佢嚟紧嘅欧国联要停赛，今场可尽情发挥。

　　克罗地亚为备战瑞典同葡萄牙亦精心点兵，但预料领队达历今场会畀部分新人吸取经验，包括首次入选嘅禾夫斯堡后衞邦拉锡、波尔多中场杜马巴锡及PAOK射手却拉克，相信佢哋都会争取表现。克罗地亚近7仗全开3球或以上，遇上求胜心切嘅土耳其，对攻格局必多波入。