般尼仲未開齋頹爆
　　本周英超打頭陣嘅，係提早上演嘅護級大戰，包尾嘅般尼作客白禮頓。般尼從上季一度講到有機會爭歐洲賽資格，搞到依家新一季開咧6戰仲未開齋，球隊疲弱嘅攻力係致命原因，白禮頓雖然亦只得1勝，但7場聯賽場場有波入，有力喺般尼身上全取3分。

　　般尼係疫情下細球會嘅寫照，由於冇曬球迷同周邊收入，球會經濟損失高達5,000萬鎊（約5億港元），夏天基本上並冇資金增兵，導致成績亦一落千丈。英國傳媒報道，般尼主席加利克已經准備賣盤割愛，對方係一名埃及商人。

　　般尼6場聯賽僅入3球
　　般尼今季最大鑊，係前鋒把握力弱，6場聯賽只入過3球，包括最近3場對西布朗、熱刺同車路士都吞蛋。咁啱得咁橋，白禮頓喺季初都已經對咗呢3隊，雖然只得1和2負，但3場都入到波，累積今季7場聯賽入11球，而且場場都取得士哥，淨係計把握能力已經睇到今場勝負分野。

　　白禮頓上場斗熱刺，球隊收起首席射手馬奧比，連大軍名單都冇份，據聞係因為呢名法國前鋒過分自大，因性格問題成日同隊友嘈交，畀領隊朴達雪藏「內部停賽」，希望佢可以好好反省，今場馬奧比將會重新列入大軍名單，球隊鋒力增強，主場可以打爆般尼全取3分，主勝好路。