兩支聯賽仲未開齋嘅球隊，今晚英超頭場對碰，富咸主場迎戰西布朗。呢場「水斗水」邊隊贏波、開大開細冇路捉，不過單從盤路角度，邊隊讓波都冇著數，一定捧對家。今場讓球主客和富咸要讓一球，梗係捧西布朗讓球客勝。

　　富咸主場全敗

　　富咸今季6場聯賽未贏過，輸咗5場僅和1場，當中3場主場全部輸曬。以往富咸喺卡雲農捨球場出擊，都有一定威力，不過因疫情關係，冇曬球迷入場支持，「弱旅靠主場」呢支歌仔都唱唔到。

　　同樣係昇班球隊嘅西布朗，一樣經歷聯賽開季6場不勝嘅尷尬局面，不過佢哋演出較有保證，近4場有3場和波搶到分，包括同勁旅車路士踢成3比3，整體表現比富咸好。而且雙方近4次交手全部和波，實力明顯係半斤八両，西布朗有得受讓，變相好抵玩。