落场争上位斗志更盛
　　欧霸盃J组重头戏，热刺作客比利时球会安特卫普。两队首轮赛事同样旗开得胜，今场赢波嗰队将可为出线打下稳固根基。实力超班嘅热刺又有机会「晒命」，人满之患嘅锋线势必轮换，但后备球员同样具质素，有得落场争上位斗志可能仲旺盛，中位数2.5球入球大值博。

　　连同外围赛在内，热刺今届欧霸盃4战全胜，合共轰入15球，呢支前届欧联决赛份子，以超班姿态踢欧霸盃分组赛，可以尽情大开杀戒。哈利卡尼同孙兴民呢对当今欧洲数一数二嘅前锋组合，今场可能会先任后备，不过就算派遣新加盟嘅加里夫巴利拍住卡路士云尼斯奥斯等二线兵攻坚，亦有足够火力争取入波。

　　热刺喺周二凌晨赢般尼嘅联赛，加里夫巴利同卡路士云尼斯奥斯都冇上阵，卢施素及拉美拿等亦只係后备登场，一众球员养精蓄锐等今场搏杀。巴西前锋卡路士云尼斯奥斯首轮处子战已交出2个助攻，「大圣爷」嘅实力同卡士亦唔需要多介绍，加上佢哋近5场作客全胜，当中4场总入球达3球或以上，造访安特卫普可谓杀声震天。

　　安特卫普踢法开放
　　现时喺比甲排榜首嘅安特卫普，小组首轮作客2比1赢卢多格德斯，不过今场阵容不整，虽然艾度拿尔锡克同佐敦卢卡古感染新冠肺炎康复，但就轮到巴图宾斯卡同文奴宾臣确诊。佢哋风格大开大合，近7场总入球全开3球或以上，主场面对热刺唔慌会缩，随时又嚟大手交易。